توپراخ آغلار یل آغلار
یاغیش داشار سل آغلار
حق یولوندا اولنه
اوت سو آغلار ائل آغلار
عزیزینم بیرده گول
سن عزیزسن بیرده گول
گولسن کونلوم گولر
اولسم گوروم بیرده گول
اوخور بولبول گولور گول
اوینور سونبول گولور گول
یار یارینان گوروشسه
گولور دوداخ گولور گول
یازیلمیش: یاییلان گون
تاپدالاندی تالاندی
درد توپلاندی قاللاندی
توپراخ سورولدی یاندی
آرزولاریم جالاندی
سومک یولی دالاندی
درده بوللی سالاندی
ایرییه یوخ دوزه گئت
دونیا دولی یالاندی
کونولومده نالاندی
بو درد مننن قالاندی
هارا گئتسن گوررسن
ایرینی دوز آلاندی
عزیزینم درد آغلار
گولر دونیا فرد آغلار
ایگیت بختی باغلانسا
یر گوی آغلار مرد آغلار
یازیلمیش:آغلار گولر (فروردین)آیینین ایرمی ایکینجی گونی ۱۳۹۲ - می آیینین ایرمیبیرینجی گونی ۲۰۱۳
گوننریز بایرام باریش اولسون
تویلاردا گولش یاریش اولسون
قیشدا شیرین سولی آلمالار
هر اوده بوللی ناریش اولسون
دوردانناندا کاش دونیانین دورد بوجاغیندا همشه باریش اولا
چالیب اویناماغ اولا
گولوش گولدورمه اولا
کاش...
بایرام گلدی یاز گلدی
گولوش گلدی ساز گلدی
یار یارینا یتیشدی
سومک گلدی ناز گلدی
بایرامیز کوتلو اولسون
احد ایسفندیار اوغلی
اوزومنن اوزاخلاشمیشام من
داها اوجا گولممیرم من
داها داغا گدممیرم من
داها ماهنی دیینمیرم من
اوزومنن اوزاخلاشمیشام من
نه گوزلیدی اسکی گوننریم
اوزلیدی منیم اوز گوننریم
ایندی داشا دونوبدی گوننریم
سوزومنن اوزاخلاشمیشام من
ساآت نجه دوروب قارشیمدا
فیریلداخ سیرتیلیب قارشیمدا
اودوشی گورسدیر قارشیمدا
دوزومنن اوزاخلاشمیشام من
سوگیلیم یوخ الینن اوپم
یانقین دوداخ ، دیلیننن اوپم
اوپم اوپم ، دیلینن اوپم
گوزومنن اوزاخلاشمیشام من
یتیشسه پیسلوخ اوزون نندی
دیل سویلر یالان سوزون نندی
احد باخ ، ایری گوزون نندی
اوزومنن اوزاخلاشمیشام من
یازیلمیش:بایرام آیی نین اون اوچونجو گونونی سات:21:30 - 1391
3 March 2013
یورولموشام بو دونیادان
اولماخ ایسدییرم تانریم
یورولموشام بو دونیادان
یاتماخ ایسدییرم تانریم
یورولموشام بو دونیادان
بولانمیرام نقدر آریرام
اوز ایشیمه نقدر یاریرام
کوچموشم نقدر قالیرام
یورولموشام بو دونیادان اولماخ ایسدییرم
دیرسیز داشلار آلیرام
بیلمیرم نه ساز چالیرام
قورخو جانا سالیرام
یورولموشام بو دونیادان اولماخ ایسدییرم
یاردیم ادممیرم ایسدیینه
آغزیننان ووراممیرام پیسدیینه
چیغیرانمیرام سوس سیسدیینه
یورولموشام بو دونیادان اولماخ ایسدییرم
دیری یوخ منه دونیانین
کلیی یوخ منه دونیانین
الیی یوخ منه دونیانین
یورولموشام بو دونیادان اولماخ ایسدییرم
ال اوز احددن دونیا
گوز اورت احددن دونیا
بوشال احددن دونیا
یورولموشام بو دونیادان اولماخ ایسدییرم
یازیلمیش:17 دی آیی مین اوچ یوز دوخسان بیرینجی ایلده
2013 Sun 6 jan - sat21:35
باشیوا دولانیم آی قیز
قادان اورگیمه آی قیز
سویلر دیل سنی گورنده
اولوم قوربان سنه آی قیز
یازیلمیش:دی آیینین بشینجی گونو - سات 10:25
مین اوچ یوز دوخسان بیرینجی ایل
Tue 25 dec 2012